El Livro de Yona en Ladino

El Livro de YONA en Ladino

O Livro de Jonas tradução em Ladino, versão preservanda em   judeu-espanhol. Concentra-se na transmissão do texto bíblico no contexto da cultura sefardita, observando especialmente o uso do Ladino/Judeu-Espanhol como língua de tradução, leitura e transmissão religiosa entre comunidades judaicas de tradição sefardita.

Kapitolo 1

1 I fue profetezia de Adonai a Yona ijo de Amitai, diziendo "Alevanta! Anda a Ninve, la sivdad la grande, i apregóna sovre eya, ke ya suvió sus mal de delantre de mi". 

2 I se alevantó Yona por fuyir a Tarshish de delantre de Adonai. I desendió a Yafo i topó una nave partiendo para Tarshish. I pagó su nolo, i entró en eya por venir kon eyos a Tarshish de delantre de Adonai.

3 I Adonai echó un aire grande en la mar, i fue tempesta grande en la mar. I la nave se pensava ke se iva romper. 

4 I se espantaron los marineros, i esklamaron kada uno a su dio. I tomaron i echaron los atuendos ke avia en la nave a la mar, por alivianar de sovre eyos, i Yona abashó a los rinkones de la nave i se echó i se durmió. 

5 I se aserkó a el, el kapitan de la nave, i le disho a el, "porke estas durmiendo? Alevanta! Yama a tu Dyo! Puede ser ke se pensa i se arepiente El Dyo por mozotros i no mos depiedremos". 

6 I disheron kada uno a su kompaniero "Venid, i echaremos suertes, i savremos por kavza de kuala persona está viniendo este mal sovre mozotros". 

7 I echaron suertes, i kayó el suerte sovre Yona. I le disheron a el, "Te rogamos ke mos digas! Por ke kavza mos vino este mal a mozotros? Ke echo azes i de onde vienes? De ke pais sos tu, i de kuala nasyon sos tu"? 

8 I disho a eyos "Judio so yo! I de Adonai, Dyo de los sielos, yo me espánto, El ke izo a la mar i a lo seko". 

9 I se espantaron los varones temor grande, i disheron a el, "Porke izites esto? Siendo ya supieron ke se estava fuyendo, i el se los avizó a eyos. 

10 I le disheron, "Kualo te aremos a ti para ke se akede la mar de sovre mozotros? Siendo la mar era andando i tempesteando". 

11 I disho a eyos "tomádme i echádme a la mar para ke se akede la mar de sovre vozotros. Siendo yo ya se, ke por mi kavza viene esta tempesta grande sovre vozotros". 

12 I aremaron los varones para tornar a lo seko, i no pudieron, porke la mar andava i tempesteava sovre eyos. 

13 I yamaron i rogaron a Adonai i disheron. "Rogo Adonai, non ahora mos depiedreremos por modre de esta persona. I non mos kavzes a vertir sangre de inosente, siendo Tu sos el Dyo Poderozo. Asegun enveluntates, izites". 

14 I lo tomaron a Yona, i lo echaron a la mar, i la mar se akedó de su ravya.

15 I se espantaron los varones temor grande de Adonai, i tomaron prometas para ofreser sakrefisios.

Kapitolo 2

1 I aparejó Adonai un peshe grande por englutir a Yona. I estuvo Yona en las entistinas del peshe tres dias i tres noches. 

2 I izo orasion Yona a Adonai su Dyo de las entistinas de el peshe. I disho de la angustia "Yami a Adonai, i me respondió". 

3 De la vientre del inferno esklami, i oyites mi boz! I me rondjates a el abizmo en medio las mares. I el riyo me arodeó. 

4 Todas Tus kevras, i todas Tus olas de la mar, enriva de mi, pasaron. I yo dishe "Ya vino el kavo, i me desteri de eskuentra Tu presensya".

5 Yo solo ke dezeo es, de ver otra ves la ermozura de el palasio de Tu santedad. 

6 Me arodearon las aguas asta la alma. El abizmo me kuvijó. Las kanyas de la mar se izieron komo bandaje en mi kavesa. 

7 A los simientos de los montes abashi. La tierra serró sus kavenados a mi por siempre. Estonses, me salvates mi alma de la foya". 

8 O! Adonai, mi Dyo! Kuando se dezmayó mi alma, me akodri de Adonai. I mi orasion alkansó asta ti, asta el palasio de tu santedad". 

9 Akeya djente ke esperan i kreyen en nada i en vanedad, eyos deshan i piedren las buendades del Todo Poderozo. 

10 Yo, por mi, kon boz de munchas grasias, vo sakrefikar verso Ti. Lo ke prometi, por seguro lo vo pagar, siendo la salvasion apartiene a Adonai. I komando Adonai a el peshe, i rebosó a Yona a lo seko.

Kapitolo 3

1 I fue la profetezia de Adonai a Yona segunda ves diziendo, "Alevanta, va a Ninve, la sivdad la grande, i apregona en eya la proklamasion ke yo te vo dizir a ti". 

2 I se alevantó Yona, i anduvo a Ninve, asegun le enkomendó Adonai. 

3 I Ninve era una sivdad bastante grande de El Dyo, ke era tres dias de kamino. 

4 I empesó Yona por entrar en la sivdad kamino de un dia, i gritó i disho "otros kuarenta dias, I la sivdad de Ninve se va ruinar". 

5 I la djente de Ninve kreyeron en el Dyo, i apregonaron taanit i se vistieron de sako, de el grande asta el mas chiko. 

6 I alkansó la koza asta el rey de Ninve, i se alevantó de su trono, i se desvistió su manto de rey, i se vistió de sako, i se asentó en basho en la siniza. 

7 I kitó un komando en la sivdad de Ninve de orden de el rey i de sus grandes, diziendo "ninguna persona, ni dinguna bestia, ni vaka ni kodrero, no tienen de gostar o komer nada, i no tienen de bever ni agua. 

8 I tienen de vistir panios de sako, los ombres i las bestias. I todos ke esklamen al Dyo, kon una fuerte rogativa. I ke tornen kada uno de su kamino el malo i de las negreguras ke se topan en sus manos. 

9 Ken save? Puede ser ke se arepiente el Dyo, i torna de su ravya i no mos depiedremos"! 

10 I el Dyo vido a Sus echas, ke trokaron de sus kamino el malo. I se arepintió El Dyo por todo el mal ke disho de traer sovre eyos, i no lo izo.

Kapitolo 4

1 I le desplazyó a Yona, i le embarasó muncho. 

2 I izo orasion a Adonai, i disho, "Rogo Adonai, esto no es lo ke dishe yo del presipio? De kuando estava ayinda en mi tierra"? "Es por esta razon ke me apresuri por fuyirme a Tarshish. Siendo, yo se por seguro, ke Tu sos Dyo grasiozo i piadozo, longo de pasensia i azién muncha buendad, i Te arepientes de trayer el mal. 

3 I ahora, Adonai! Torma mi alma de mi! Porke mijor es la muerte mas ke mi vida". 

4 I le  disho Adonai "Esta kantidad te embaraso"? 

5 I partió Yona de la sivdad i se asentó del oriente a la sivdad. I se fraguó una kavania i se asentó debasho en la solombra, asta ke iva ver, kualo va ser de la sivdad. 

6 I aparejó el Todo Poderozo, una planta yedra, i kresyó esta planta enriva de Yona por ser solombra sovre su kavesa para eskaparlo de su sufriensa. I se alegró Yona por esta planta de yedra, una alegria grande. 

7 Ma El Dyo aparejó un guzano en la alvorada de la maniana al otro dia. I la komió a la planta, i la planta se amurchó i se sekó. 

8 I fue komo esklareser el sol, i aparejó el Dyo un aire de solanos terrivle. I aharvó el sol kayente en la kavesa de Yona, asta ke se estava dezmayando. Estonses, demandó Yona su muerte, i disho "Mijor es mi muerte mas ke mis vidas". 

9 I disho el Dyo a Yona "Esta kantidad te embarasó, ke se amurchó la planta"? I disho, "Si, me embarasó muy muncho, asta la muerte". 

10 Estonses le disho Adonai "Tu te apiadates de una planta, ke ni lazdrates para kriarla, ni la engrandesites. Ke de una noche kresyó, i a la otra noche se amurchó! 

11 I yo, komo ke no me apiade de Ninve, la sivda la grande? Ke moran en eya mas de dodje milarias de personas, ke no konosen entre su derecha a su izkierda? I ke ay tambien bastante animales"?